საქართველოს რიგ რეგიონებში, სადაც თბილი და ზომიერად ტენიანი კლიმატური პირობებია, მეციტრუსეობა ფართოდაა განვითარებული. აქ, სამრეწველო დანიშნულების ფართობების გაშენება ციტრუსოვანი კულტურებით გასული საუკუნის დასაწყისიდან იღებს სათავეს.
საქართველოში ციტრუსის ნარგაობათა 90% დასავლეთ საქართველოში - აჭარაში, გურიასა და სამეგრელოშია გაშენებული, აქ მეციტრუსეობის განვითარებისათვის საუკეთესო კლიმატური პირობებია. ქვეყნის მასშტაბით, ციტრუსის ბაღები 7-8 ათას ჰექტარს მოიცავს. საქართველოში წარმოებული ციტრუსის უდიდესი ნაწილი აჭარის რეგიონზე მოდის, სადაც ციტრუსს 23 000-მდე მცირე და საშუალო ზომის მეურნე აწარმოებს. ციტრუსოვანთა ბაღების მთლიანი ფართობიდან მიღებული საშუალო მოსავალი კი 85 000-მდე ტონას შეადგენს. მოსავლის 90% მანდარინის, 4.6 % - ფორთოხლის, 4.3 % - ლიმონის, ხოლო 0.03% გრეიფრუტის ნარგაობებიდან მიიღება.